Puode parecer stranho screbir lhiberdade cun “lh”, quando l sendinés nun diç assie, mas hoije ye l die 25 de Abril i la cousa melhor que mos truxo fui la libardade (eiqui screbi cumo dezimos an Sendin). Se la libardade fui l percipal, nun mos bamos a anraibar solo porque hai la libardade de screbir “l” an beç de “lh”. Bal la pena preguntar, se l mirandés serie lhéngua ou léngua oufecial se nun stubissemos an democracie.
Este fui l 25 de Abril
Mas se l 25 de Abril truxo la libardade, nun quier dezir que yá somos libres, para se ser libre hai que tener ls meios para eisercer ls nuossos dreitos, an liberdade. Mas durante estes 34 anhos zde l 25 de Abril, inda nien sabemos quales son ls nuossos dreitos, porque uns poucos se aporpiórun de l dreito de dar ou tirar ls dreitos de las pessonas.
Hoije inda hai desto an Sendin
Oubo muitas bezes dezir que tenemos que ser nós a fazer las cousas, que nun podemos star siempre a pedir. Que l 25 de Abril tamien se fizo i que cada un ne l sou tiempo, debe fazer. Que fácel ye falar quando se ténen ls meios. Mas ls capitanes sien armas tenerien feito l 25 de Abril? Hai que tener ls meios para las pessonas séren libres.
Cumo gustei de oubir ls moços que hoije falórun na Assamblé de la Republica.
Ser libre cumo la androlina i tener l cielo cumo fin
Ls melitares de Abril son de loubar, porque tenendo ls meios, ls soubírun poner al serbício de l pobo. Mas hoije ls que ténen ls meios outelizan-los para sue baidade. De nada bal querer, se nun se tubir l poder, por esso tenemos que outelizar l único meio que tenemos, que ye l boto para dar l poder a quien ye capaç de dar. I mesmo assi nun faremos grande cousa. L Zimbabué anda por ende, ls botos a las bezes pouco bálen.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
