DE QUIEN YE LA CULPA?
Hoije tube que ir a Miranda i al chegar quedei ademirado de ber tanto altemoble i tanta carreira spanhola, nin habie onde stacionar l carro. Preguntei porque serie que habie tanto spanhol nua quarta i dezírun-me que era die nomeado an Spanha.
Cumo ye uso, nestes dies ben muita giente a Miranda.
Ls altemobles fazíen un carreiron cumo las formias
Mas cun tanta giente a besitar la cidade, ls sotos parece que nun bendien muito. Ne ls últimos anhos ls spanholes deixórun de benir a cumprar i bénen mais por comer. Mas l que se puodo ber, fui ua falta grande de saber dar a esta giente toda, rezones para bolber a cumprar cousas.
Las carreiras
Mas l pior ye que toda esta giente se queda por la cidade i nun hai nada nin naide que la faga ir a las outras tierras. Hai uns papelicos cun uns retratos mui lindos i que cústan bun denheiro de todos nós, mas que naide lei i que inda nunca naide soubo para que sírben.
Falei cun alguns spanholes i nunca bírun nada desso. Sáben solo aqueilho que ls que ourganízan las besitas, an Spanha, le dízen.
Tamien benírun grupos de ciclistas
Se queremos tirar algo de l turismo tenemos que ser nós a ourganizar i a ouferecer las cousas. Tenemos que ser nós a andicar i a mostrar als turistas, todas las tierras de l cunceilho.
Stou mesmo a oubir dezir:
-Anton porque nun fazes tu?
-Porque quien ten ls meios i l denheiro i quien aproba ls porjetos i ls faç, nun sou you. Nun sou de l turismo, nin de la Câmara. Mas esses ténen giente a ganhar denheiro para fazer essas cousas.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
