Yá bos falei eiqui de l çporto scolar de las nuossas scuolas i de l pabelhon çportibo, mas inda nun tenie ido a ber nenhun jogo oufecial i digo oufecial, porque hai mesmo campeonatos scolares, antre las bárias scolas de l çtrito i até de outras regiones. Onte fui l FUTSAL de moços i moças i era mesmo a sério.
La nuossa eiquipa de moças
La eiquipa de moças de Bomioso
L jogo fui contra la scola de Bomioso i las moças fazírun un jogo bien animado. La eiquipa de Bomioso tenie dues jogadoras que desanquelibrában l jogo, ua por la sue hablidade i la outra por l sou fuorte puntapie, mas las de Sendin tamien tenien trés ou quatro buonas jogadoras, ne l meio de las quales, Mariana fui la melhor, yá que marcou ls dous golos.
EBI de Sendin – 2
AE de Bomioso - 2
La eiquipa de Bomioso a dar l grito, antes de ampeçar l jogo
A seguir fui l jogo de ls moços i eiqui la çfrencia antre las dues eiquipas era mui grande. La eiquipa de Sendin, que ye ua de las melhores de l çtrito, an cumparaçon cun la de la scola de Bomioso, mais parecie ua eiquipa porfessional contra ua amadora. I l resultado diç todo.
EBI de Sendin – 7
AE de Bomioso – 2
La nuossa eiquipa de moços
La eiquipa de moços de Bomioso
Por l que se biu de l jogo, la nuossa eiquipa ten buonos jogadores i serie amportante que l trabalho de ls porsores de la nuossa scola fusse bien aporbeitado i ajudado. L buono antendimento antre porsores i alunos era mui buono i Sendin i las tierras alredor de Sendin, puoden star cuntentas cun l trabalho que se faç na EBI de Sendin.
L último golo de la eiquipa de la EBI de Sendin
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
