Puode parecer ua cousa stranha, screbir subre l die mundial de la tierra , neste pequeinho jornal i an que l percipal a tratar, serien las cousas que cuidamos séren las mais amportantes para nós. Mas por bezes tenemos que pensar para alhá de l que tenemos a la mano de sembrar, cumo se questuma dezir.
Eiqui la tierra inda ye pura
Este die fui criado an 1970 quando l Senador Norte-Amaricano, Gaylord Nelson, cumbinou l purmeiro portesto nacional contra la poluiçon. Ye festiado ne l die 22 de Abril i zde 1990, muitos paízes l passórun a festiar tamien neste die. I nós tenemos que mos lembrar neste die de la rezon de l portesto i pensar bien nel.
La poluiçon inda nun se bei
L portesto fui yá an 1970, mas zde anton, la poluiçon ten benido a aumentar cada beç mais por todos ls sítios. Porqui inda bamos tenendo ua aire saludáble i l ambiente nun stá mui poluído, mas tenemos que ir pensando an cuidar melhor de las cousas. Se ye cierto que nun mos podemos queixar muito, tamien ye cierto que yá bai habendo pessonas a seguir ls malos eisemplos.
Esta ye ua ribeira bien acerca
Por l retrato de la ribeira podeis ber l pouco cuidado que yá se bai bendo por ende. Mas l pior, ye l que acuntece ne ls nebros de las arribas, onde se béien yá berdadeiros moradales. I ne ls pinhos, anton, ye ua bergonha, cun mil i un artimanhos por todo l lado.
Hai que mudar l modo de tratar la tierra i ua de las percipales cousas que debemos ampeçar a fazer ye poner todo l que nun presta ne ls sítios própios i poupar la áuga, que bai a ser l maior porblema de la tierra.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
