Ne ls últimos cinco jogos l G. D. Sendin cunseguiu quatro bitórias i un ampate. Ten sido un final de campeonato mui buono i solo bieno poner l nuosso clube ne l lugar que l pertenece, antre ls purmeiros.
Hoije fui l último jogo an casa i ganhou al Lamas .
Sendin – 2
Lamas – 0
L Sendin a acalcer las piernas
Antes de ampeçar l jogo i porque staba friu i l campo staba cheno d’auga, nun fizo mal fazer uns eisercícios para acalcer las piernas. Mas parece que nun serbiu de muito yá que l jogo fui mui fraco ne ls purmeiros minutos. Las eiquipas demorórun a ampeçar a jogar i solo a la meia hora de jogo l Sendin tomou cunta de l jogo.
L Sendin tomou cunta de l jogo
L Lamas ye ua eiquipa de las mais mal classeficadas de l campeonato, mas neste jogo, nun pareciu yá que fizo un jogo agradable. Mas l Sendin, animado cumo staba, por l que fizo ne ls últimos jogos, de brebe tomou cunta de l jogo, mas solo al acabar la purmeira parte cunseguiu fazer l 1-0 .
Na segunda parte l Sendin atacou mais
L campo cheno d’auga
La segunda parte, cun l campo cheno d’auga, nun daba para jogar mui bien, mas l Sendin cuntinaba a jogar mais. Ls jogaores íban caendo muitas bezes i ampeçorun a quedar cansados. L Sendin cun jogadores mais nuobos aguantou melhor i fizo l 2-0 cun toda la naturalidade. Poderie tener ganhado por mais, mas l Lamas tamien nun merecie perder por mais i l 2-0 fui justo.
L cumbíbio final
Cumo ben sendo uso i ye buono falar nestas cousas, l Sendin dá siempre ne l último jogo ua merenda a todos ls que stubírun ne l jogo. Jogadores de las dues eiquipas, árbitros i giente que stubo a ber. Cuido que l çporto debe de ser assi, mas ye pena que inda haba giente que assi nun pensa.
A assar la chicha
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
