Ls cunfrades de barria chena
Hai las cunfraries oufecializadas i que todo fázen para çfendéren detreminados pordutos i fázen ancontros para coméren i/ou bebéren esses pordutos porparados de la melhor maneira.
Pus an Sendin hai ua cunfrarie, que nun ye ouficial, mas que tamien sigue ua tradiçon, que se bai mantenendo.
Ls peixes de l riu
Al fin de la tarde de un Sábado, ajúntan-se ls cunfrades i ban pal riu, lieban bebidas i merenda i trátan de pescar ls peixes. Barbos i bogas son ls percipales peixes que péscan, mas se sal ua carpa tamien se aporbeita, mas nun ye l oujetibo de la pesca desse die.
Ls peixes a assar
Ls peixes son porparados de dues maneiras, uns assados nas brasas i outros fritos. Ls assados al lume líeban bastante sal i na barriga uns cachicos de toucino de l mais gordo i que le bai a dar un gusto melhor. Apuis faç-se l molho cun azeite, pomiento, binagre, salsa, alho i outra cousa que nun sei, porque ye l segredo de ls cozineiros.
L prato cun ls peixes prontos a comer
De antrada i anquanto nun se ban ajuntando todos a la mesa, comen-se uns cachicos de toucino frito i bai-se porbando l bino, a ber qual ye l melhor para acumpanhar ls peixes.
Cun ls peixes come-se un arroç malandro, de freijones bormeilhos i salada a la farta, de regaho i de alface.
La mesa cun la salada bien a la bista
Que mesa, i que três!...
Ls cunfrades cómen cun gana i solo ye pena estes pratos tan naturales, nun séren mais coincidos i que por cierto trairien turistas a las nuossas tierras, mas inda ye mais pena ls sendineses que bíben fuora, nun aporbeitáren estas cousas quando acá bénen.
Un cachico deste toucino nun bos sabie bien?
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
