Ne l Ciclo criou-se l clube Kuadruklube, que ten cumo oujetibo l studo spremental i pormober la ounion antre la ciência, la sociadade, la tecnologie i l meio ambiente. Ls porsores respunsables, Carlos Guedes, Cremilde Carção, Paula Meleiro i Sandra Martins, ténen cunseguido la partecipaçon de quaije todos ls alunos, de ls 7º.,8º. E 9º. anhos.
Las atibidades son muitas i cumo bimos onte la rádio, hoije mostro-bos l jornal.
Un númaro de l jornal
L jornal ye l pouliteiro i para ajudar las çpesas, custa 50 almendras (ou ua almendra nun bal muito ou l jornal ye mui caro) i ten cousas mui anteressantes de ler i serie buono que fusse mais coincido. Mas inda hai por ende ls que se amportan mais an séren eilhes coincidos i amostrados, que la sue tierra i la sue scuola.
La scuola de l lado de l pabelhon
L jornal fala-nos de ls çportos que se fázen na scuola i son muitos zde l FUTSAL al Tenis de Mesa, de l Atletismo al Basquetebol i ne ls quales la scuola ten ganhado muitas probas. Inda hoije fui a Braga jogar Tenis de Mesa. L pabelhon ten muito uso i ten mesmo un “SLIDE” para çportos radicales.
L çporto scolar
Tamien mos fala de l site www.kuadriklube.blogspot.com , onde pónen nuobas de la scuola. Outra de las páiginas ye subre l mirandés i ten testos i bersos de ls alunos.
Cumo curjidades ten la scuolha de libros por parte de porsores i que ye anteressante.
- Clube dos Poetas Mortos de N.H.Kleinbaum
- O Evangelho Segundo Jesus Cristo de José Saramago
-O Principezinho de Antoine de Saint-Exupéry
- Vai onde te leva o coração de Suzana Tamaro
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
