L SAL ten la sue rádio – La rádio Sendin an linha - , que todos ls dies ye scuitada por muitos sendineses an bários sítios de l mundo. Mas l que poucos saberán ye que ls nuossos moços i moças tamien ténen la sue rádio i que todos ls dies pon música, faç antrebistas i dibulga las atibidades que se ban fazendo ne l Ciclo.
L logótipo de la MP3scola
Esta rádio ye mais ua atibidade de l Ciclo, que bai porparando ls nuossos studantes i que faç cun que antre eilhes haia mais ligaçon. You stube a ber cumo era i alhá ancuntrei dues moças, que mais parecíen dues berdadeiras locutoras.
Las dues moças a poner música
La stacion de rádio ye pequeinha, mas sirbe a las mil marabilhas para la funcion.
Por l que puode saber, bários alunos ne ls tiempos libres ban alhi a daprender a trabalhar cun essas cousas i a praticáren las nuobas tequenologies.
La staçon de rádio
Ye cun einiciatibas cumo esta, que se cunsigue que la scuola seia un sitio an que todos, alunos i porsores, gústen de star, porque se sínten úteles i sáben que l que fázen ye para la sue scuola i para la sue formaçon.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
