Hoije besitei la scuola EB 1,2 de Sendin, para bos mostrar cumo funciona i para saber de las atibidades que po lhi se ban fazendo i de que la maiorie de la giente nun sabe. Zde que ampecei a screbir ne l Hoije que tengo cada beç mais, la oubrigaçon de bos mostrar todo l que se bai fazendo na nuossa tierra.
Naide me mandou ampeçar i agora, cumo muitos sendineses d’acá i de ls que stan por esse mundo afuora, se habituórun a ler l hoije , solo se la salude nun me ajudar ye que deixarei de screbir.
La frente de la scuola EB 1,2
Cumo nun podie deixar de ser, ampecei por ir a cumprimentar l cunseilho diretibo i pedir outorizaçon para fazer l miu trabalho. Fui bien recebido i lougo me anformórun de todas las atibidades, que se bénen fazendo i que se ban a fazer.
Hai muito que cuntar i ye l que bos mostrarei durante alguns dies.
L cunseilho diretibo
Stában a trabalhar i assi cuntinuórun, apuis de falar-mos subre l sou trabalho para bien de la scuola i de l ansino.
Hai muitas i buonas açones que se stan a zambolber cun la partecipaçon ampenhada de muitos porsores i alunos. Mas essas quédan para outro die.
Hoije mostro l asseio i cuidado cun que trátan la scuola i esso nun ye solo obra de l cinseilho diretibo, mas tamien de l pessonal oussiliar i de ls alunos.
Ls cacifros i l suolo dízen todo
Ua aluna a abrir l sou cacifro
Por l purmeiro retrato i por este, puode-se ber que hai cuidado cun la scuola, que parece nuoba, mas yá ten mais de 25 anhos.
L ambiente antre porsores i alunos tamien se puode ber que ye buono. Sendin debe tener proua cun la sue scuola.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
