La belharda era un jogo que ls moços i moças de menos de 16 anhos jogában d’atrás. I nun quereis saber que hoije bi un grupo a jogar esse jogo!...
Arrimei-me a ber i preguntei que jogo era aquel?
Lougo se ampeçórun a rir, porque lougo pensórun que l que you querie era tirar l retrato para la anternete.
A jogar la belharda
You inda me fiç desantendido, mas cuntinuórun a jogar cumo se nada fusse, mas l porsor que staba cun eilhes, lougo me dixo que era un jogo que jogában todos ls dies.
Ne l Ciclo, que fui onde you ls ancuntrei a jogar, daprendírun este jogo, ne l seguimento de las aulas de mirandés i nunca mais deixórun de l jogar.
La belharda por l’aire
A ir por la belharda
Cumo hai moços i moças de bárias tierras alredor de Sendin, l jogo tenie bárias bariantes. Quedórun de me screbir las reglas, mas an mirandés i un die destes yá bos las screbirei eiqui.
You inda las sei, mas quiero que séian eilhes a screbir.
A fazer las poçacas
Solo ua pequeinha splicaçon para antender ls retratos:
La belharda ye un palo pequeinho que un de ls jogadores atira para l meio de ls outros que, cun un palo maior, téntan atirá-lo l mais longe possíble. Anquanto l que atirou la belharda l bai a agarrar i nun l pon ne l lugar de un de ls outros jogadores, estes fázen un buraco ne l sitio de l que atirou la belharda…
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
