Porparaba mais ua nuoba subre l Ciclo i mirai solo l que acunteciu hoije!..
Ls mais pequeinhos fazíen un antremés subre ls fruitos de la huorta. Yá muito que nun iba al jardin de anfancia i nada melhor que ir a ber.
Stában alhá muitos garotos de la scuola purmaira a ber i alguns pais. Para ls que nun podírun ir a ber, i serie anteressante que ls pais ífússen a ber l que fázen ls sous filhos, fui you para l mostrar. La scuola ten que ser un spácio abierto i an que todos partecípen.
Ua parte de ls que stában a ber
Ne l antremés, cada garotico mostraba un fruito i dezie un berso, éran garoticos cun menos de 6 anhos, mas yá parecíen berdadeiros atores. Gustei muito de ber l trabalho de las euducadoras de anfancia i inda mais ls pequerruchicos a dezir ls bersos. Esta ye la berdadeira poesie, que sal pura de ls coraçones.
Ls fruitos de la huorta
Fui ua leçon prática i an que todos partecíporun. Mesmo ls que stubírun a ber, daprendírun l balor de comer ls fruitos de la huorta i daprendírun a cumbibir de un modo saudáble, cun alegrie i amisade. Sendin bibe i solo quier que l deixen bibir.
Ls ninos de un lado
I ls de l outro
Ne l fin i cumo nun podie deixar de ser, houbo sumos i doces, para todos, mas cun moderaçon.
Fui ua linda tarde de fiesta. Ye assi que debe de ser l ansino, ua fiesta an que todos se síntan felizes.
Sabien bien ls doces i ls sumos
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
