La huorta stá pronta para poner. Auga parece que nun bai a faltar, la ribeira passa mesmo a la puorta, cumo ye uso dezir-se, mas hai siempre un se nun fuora.
La auga, que bino cuntaminada ou l friu, dórun cabo de las oulibeiras. Dezie assi un labrador yá antradote an eidade:
- Cada beç dá mais la gana de deixar todo de adil. Yá nun chega naide fazer causo de nós i inda l tiempo nun mos ajuda. Zde que se m’alembra ten sido assi, ua bida de mete pie, saca pie. Yá miu pai passou pul mesmo martírio. L miu filho yá studou, mas para quei? Ls buonos ouficios son siempre pals outros.
A las bezes quaije me dá gana de dezir que nun hai Dius. Fálan an Job, na biblia, you si que sei que hai muitos cumo el.
La huorta yá stá pronta
Pus ye berdade, miles de oulibeiras, pul termo todo, stan a secar. Quien s’amporta de saber l que fui?
De ls subsídios i de l denheiro que ben de la UE si que s’ampórtan, mas l que nun dá para antender ye que zde hai mais de 20 anhos, son siempre ls mesmos, seia l goberno de dreita ou squierda. Ls senhores angenheiros!!!
Las oulibeiras secas
Nun era solo l labrador que staba zacracionado, tamien you i cun ganas de ancuntrar por li un desses angenheiros, que por you falar nua reunion, quaije me queríen matar, pul menos cun ls uolhos.
Mas hai siempre, tamien, un anjo de la guarda para mos acalmar.
Que bedes neste retrato?
Ye berdade, ua liebre amarrada a scuitar l que deziemos.
Quando la bi tirei-le l retrato. Iba a perguntar-le se tenie oubido l que falemos i a ber se mos daba rezon, mas tamien eilha nada quijo cun nós, mal ampecei a andar caras a eilha, à patas, corriu, corriu, até deixar de la ber.
Quedemos a rir. Tamien nun puode ser todo malo, esto tamien ye bida i fui un sfregante que baliu muito.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
