Apuis de onte bos mostrar ls agriones i las alrabaças tenerie que bos mostrar l cuco i la boubielha. Nun fui fácele arranjar modo de l fazer, mas todo se faç, l que ye perciso ye eimaginaçon. L cuco nun se deixa ber, mas ancuntrei este retrato i para ls que nunca bírun un cuco, siempre ye amportante.
L cuco
La boubielha era fácele tirar-le l retrato, mas ancuntrei dues cousas anteressantes i que debo poner eiqui. Ua ten a ber cun la cunta de Zenízio. An Zenízio cunta-se ua cunta de la boubielha, por esso lhe cháman boubielhos, mas esta ye de outra tierra.
“ Ua boubielha tenie feito l niu an drento de la eigreija, sien naide se dar cunta. Un die pormanhana, la boubielha saliu por la jinela. Cumo al bolar parece toda branca i cumo tenie na cabeça la poupa, ua tie que la biu salir, puso-se a gritar que Nuossa Senhora tenie salido de la eigreija a bolar. La poupa buolbiu para l niu i eilha mais se acraditou que era Nuossa Senhora.”
Ua stampilha
La outra ten a ber cun la stampilha que ls spanholes fazírun cun la boubielha. Por esso sculhi poner eiqui la stampilha an beç de l retrato.
Cumo stamos a falar de paixaros, nada melhor que poner tamien l retrato de la chelubrina, que cumo dízen an Sendin, ye l paixaro de Abril, yá que canta:
Abril, Abril, Abril.
La chelubrina
Stamos an Abril i yá chuobe sien parar. L dito stá mesmo meio cierto.
Abril augas mil, coladas por un mandil.
Augas mil si que ye berdade, mas nin dous mandiles las cunseguien coar yá que chube muito, hoije anton, parecie un delúbio.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
