Inda bamos oubindo por ende esta pergunta. I quando falamos an algua cousa que puode ser amportante para la nuossa region, ls bielhos de l Restelo ampeçan lougo a dar reitólicas subre l que sáben i nun sáben. Mas l hoije cuntina siempre a mostrar l que pensa ser amportante.
Antes de la nuoba de onte tenie ua yá feita para poner, mas quedou para hoije. Tamien ye subre turismo.
Sábado passado por la tarde
Tamien you gusto de fazer turismo por l nuosso cunceilho i inda mais por l nuosso termo, que conheço cumo las mies manos.
Hai un rapaç que anda a daprender mirandés i scribe a las bezes pensamientos ne l SAL, scribe cumo sabe, nun passa dies a eimendar, a ler i a ber dicionairos para querer parecer mais un doutor de scanho, mas ten mais balor, porque ye autentico i berdadeiro.
Ls algriones
Dezie el:
“Quando l cuco canta
I la boubielha pon,
Amarga la alrabaça
I queima l agrion.”
Pus esta quadra fizo-me ir por ende a ber se era berdade i l passeio que dei, fui un die de berdadeiro turismo, cumo podeis ber por ls retratos.
Ls agriones yá ban meio floridos i queiman i las alrabaças yá stan duras i amárgan mesmo.
Las alrabaças
Cumo fui para l lado de las arribas, acabei por ir a forcaleiro i al chegar a las arribas, bi l rio i un barco que lebaba outros turistas. Lougo al miu lado dreito un nebro florido, ye mesmo de ls que sírben para malzinas.
Ne l meio de ls nebros cantaba l cuco. Tirar-le un retrato ye que nun cunsegui.
L nebro
Anton nun hai turismo?
Tenemos que fazer cun que ls nuossos filhos i amigos, téngan cumo you, un cachico de l cielo cumo you tube.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
