Onte fui la Assamblé Giral de la Copratiba de l azeite, para la aprobaçon de las cuntas de l anho i tamien para la eileiçon de ls nuobos diretores.
La assamblé stubo bien animada i inda bien que se çcutírun ls porblemas alhi, para nun se andar a falar sien se saber, por onde calha.
La assamblé giral
Yá bai sendo tiempo de la giente ir a las assamblés para dezir l que pensa i apercurar por las cousas. Solo assi puode haber democracie i cunfiança antre todos. Por bezes la rábia i la ambeija médran sien la giente se dar cunta i l que assucede, ye cada beç haber menos quien querga fazer parte de las direçones.
La mesa de la assamblé
Mas, ultimamente, ls sendineses parece que stan a mostrar l sou sprito de homes de trabalho i de einiciatiba. Quien lei l Hoije ten la ouportunidade de ber cumo tanta associaçon camina i faç tanto por la tierra de Miranda. Tierra de Miranda, porque ye assi que eilha se chama i de que Sendin faç parte.
La giente a partecipar
Cada beç mais, cun l sfuorço de las direçones i la bitalidade de las associaçones se bai formando ua ounion, cada beç mais fuorte de las gientes de l praino. Cun esso solo ganhamos todos, la nuossa léngua, la nuossa eiconomie i l nuosso turismo.
Nesta assamblé habie giente de Sendin, Ruolos, Picuote, Cércio, Bemposta, Trabanca, Fuonte Aldé, Atanor, Palaçuolo i solo para dezir aqueilhas de que me lembra de ber pessonas.
I inda hai quien diç que naide quier cuntas cun Sendin. Solo diç esso quien sabe que del naide l faç causo i quier meter ls outros ne l sou saco.
Hai muito sendinés que ten muito amigo por todas las tierras alredor de Sendin.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
