Que admiraçon, cun tanto que ten chobido, mal nun era, nun íren de mar a monte.
Por todo l lado ten chobido muito i nalguas tierras l temporal ten sido tamanho. Mas an Sendin la auga, assi i todo, nun ten sido de modos a fazer stragos, ten chobido ua auga bien chobida, que fizo correr las ribeiras i dado buona ceçan a la tierra.
La ribeira de la Carabilha
La seca yá era grande i la tierra staba cumo un crabo. Quien querie poner las huortas i arar uas baixas para patatas, nun podie fazer nada de jeito, por esso la auga bino mesmo a calhar, agora solo faç falta que nun benga porqui nanhun temporal i que alebante l tiempo, para poner las patatas.
La ribeira de Sendin
Mas nun mos podemos squecer que ne l Praino, ne l més de Abril, ten que chober todas las semanas, nin que seia solo un die, para l anho benir buono. Por esso l tiempo que alebante, mas que nun seia por mais que ua semana, esto para ls labradores. Ls que ténen outros ouficios tanto se l dará, mas sien buonas colheitas, tamien nun haberá muito para ls outros.
La ribeira de las Lagas
Pus ls trés retratos cumo sendo de trés ribeiras, mas ye la mesma. Las outras cuorren eigual, mas fiç d’aporpósito, poner ls trés de la mesma, para bos splicar ua cousa que faç muita cunfuson a ciertas pessonas i todos débeis saber.
L nome ouficial de la ribeira ye ribeira de Sendin , mas la giente chama-le cunsante l sitio por onde passa. Tamien ye ribeira de ls molinos i nesta ribeira habie mais de 20. You cuntei 23 i ua azeinha.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
