Le més de Maio ye le més de las froles i cumo dezie Machado, todas las froles son lindas, nós ye que podemos gustar mais duas que doutras. Tamien ye berdade que se fala i scribe de las mais bariadas froles, mas poucos fálan na frol de la oulibeira.
Ua oulibeira an frol
Staba a ler l libro de bersos – Cula Torna Ampusta Quienquiera Ara – de Francisco Niebro, un scritor sendinés i que you cunsidero l melhor scritor de léngua mirandesa quando, al ler un berso subre la frol de la oulibeira, an que diç: Agarras-me cumo frol d’oulibeira , quedei cun la curjidade de mirar cun mais atento para la oulibeira an frol.
La frol de la oulibeira
Ne l sou libro, el cumparaba la frol de la oulibeira a un momento mágico de amor, que mos agarra cun tal fuorça que quedamos presos, pus ye esso l que you senti tamien. Las froles de la oulibeira parece que prénden ua pessona, tal ye la sue beleza. Mas nua oulibeira que yá staba mais delantreira, la frol de la oulibeira dura pouco tiempo, you senti algo mais, senti la fuorça de la bida.
Quien nun queda spantado al ber esto?
La frol ampeça por ser un granico i abre-se cumo la mulhier que bai a tener un filho i de l meio sale ua bida nuoba, la azeitonica que dará l azeite, fuonte de luç.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
