Antre las barraiges de Bemposta i Picuote hai ua ampresa que faç la animaçon ambiantal, nas augas de l riu Douro. Nun cumpete al HOIJE dezir cumo ye possible, Sendin quedar ne l meio i tener un ancuradouro i naide fazer nada parecido. Mas que hai cousas que la giente nun antende, hai.
La casa abrigo de las arribas
La ampresa ten ua casa de abrigo, nas arribas i que aluga-la a quien quier bibir uns dies nas arribas i al mesmo tiempo faç animaçon ne l riu Douro, mostrando las marabilhas de las arribas, zde la barraige de Bemposta a la de Picuote i al mesmo tiempo mostra las abes.
L barco i ls responsábles por la ampresa
La biaige ye marabilhosa i las arribas bistas de l riu son un ancanto. Muitos turistas bénen a fazer esse passeio i poucas pessonas de la region l conhécen. An Sendin inda hai quien conheça estas marabilhas, mas mais por cousa de un ou dous barcos pequeinhos, particulares i porque ls nuossos bumbeiros ténen tamien un barco i que faç esse percurso a las bezes, até para stáren porparados para socorrer a quien percise.
No meio de l riu
Mourinho a mirar las arribas
Neste percurso de barco puoden ber-se bários nius de las abes de l Parque de l Douro Anternacional, cumo la cegonha negra, la águila, l abutre i ls nius de las andorinhas, nas rochas. Son cousas que bale la pena ber.
Un niu de abutre
Nun bou eiqui a mostrar todo porque nun tengo spácio i tamien para animar las pessonas a íren als sítios a ber. Tamien la mie máquina de tirar retratos nun ajuda muito. Mas manhana bou a mostrar-bos cumo ye un de ls sítios mais lindos de l percurso.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
