La REFER stá a fazer un porjeto, para candidatar al QREN, para ra rebitalizaçon de l património de la REFER, nas bias desatibadas, cumo ye l causo de la linha de l Sabor. L porjeto bai a tener cumo finalidade cumponer las staçones i dar-le outilidade.
Na staçon de Sendin
Hoije stubírun na staçon de Ruolos i de Sendin i l HOIJE fui a ber i a saber de l porjeto. Para la staçon era amportante haber ua antidade ou un particular que quejísse ambestir ne l porjeto i tomar cunta de las antalaçones. L porjeto bai ser apoiado an 70 a 75% por la UE. Serán inda cunsiderados porjetos nua área de 10km i que téngan a ber cun la Eco-pista, que quieren fazer, al longo de l antigo camino de fierro.
Por onde passará la Eco-pista
Nun pertenece al HOIJE dezir se stará bien ou nó, mas a las juntas i câmaras que son quien ten l poder. Ye por esso a eilhes que bos débeis deregir. You cumo sou tamien persidente de la Corporatiba, tratei de ls lebar a la Dega i ber l que podie ser antegrado ne l porjeto i que tenga a ber cun la Dega.
Na besita a la Corporatiba
Nós yá sabemos l que pensa la REFER i l que quier i bamos a studar l porjeto para dar la nuossa oupenion. Ls outros que fágan l mesmo. L HOIJE cumo siempre stá atento i anforma, agora tratai de saber na junta i na câmara ou na REFER i sacai tamien de la buossa cabeça eideias para apersentar.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
