Ye ua pena que haba inda giente, que por nun saber ou fazer por nun sabe, baia falando siempre de l que stá mal, i nunca ten ua palabra para ls que, sin se amportáren cun l Stado ou que béngan ls salbadores, ban fazendo por la bida i ban acrecentando balor a la nuossa region.
Ua criaçon de coneilhos
Hoije fui l die de la perbençon de la salude de ls trabalhadores i diretores de la Dega. Ua ampresa certificada faz ls eisames periodicamente. Análise de ourina, eiletrocardiograma, despiste de la diabetes i de l colesterol. Eisame geral i acunselhamento subre la saúde de cada un.
Anquanto speraba la mie beç, l persidente nun ye mais que ls outros, chegórun bários camiones para lebar bino i un para lebar coneilhos.
L camion que lebou ls coneilhos
La Corporatiba stá al serbicio de todos i hoije pesou ls coneilhos, mas noutro die son camiones de sucata, son camiones de madeira, son tratores de rachones, ye bagaço de la Corporatiba de l azeite…
Mirai bien para l camion de ls coneilhos i la Corporatiba, nun méten nojo.
Bistes l nome que ten l camion a la frente? -Campestre- esse nome stá por todas las grandes superfícies, ls coneilhos puoden ser de Sendin.
Ua coneilha cun las sues crias
Apuis de ls eisames fui a ber la criaçon de coneilhos, ls animales son bien tratados i stan an gaiolas a que you chamei familhiares, porque an cada ua staban ls coneilhos de la mesma mai i criaçon. Staba todo limpico. I nun sabíen que l Hoije iba alhá.
Hai que ancentibar i apoiar estas pessonas, que fázen mais que fálan.
La sala de la engorda de ls coneilhos
L eidificio ten dues grandes salones, nun stan ls coneilhos quando inda son pequeinhos, cun las mais. Ne l outro stán, yá sien la mai, até stáren criados. Todos ls 40 dies sale un camion carregado.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
