L nuosso Ciclo ten tamien un grupo de teatro i hoije fizo l ansaio giral de la pieça, Magnifico Reitor de Freitas do Amaral. L ansaio fui ne l salon de ls bumbeiros i assistírun todos ls alunos, ls porsores i personal oussiliar. Mas será repersentada para tola la giente ne l die 21.
A porparáren la repersentaçon
Nun bos mostro nada de la repersentaçon para que ne l die 21, ls que quejíren ir a ber, nun sában yá cumo será. Solo bos digo que bale la pena ir a ber, yá que stá bien.
Mas cumo era tamien l fin de l anho antes de ls eisames, fazírun l sorteio de la bicicleta i cousa angraciada, saliu a la bó de l que andaba cun la caixa de ls númaros.
L sorteio
Tamien fazírun la apersentaçon de todos ls que ganhórun prémios ne l çporto scolar onde la nuossa scuola fui de las que se portou melhor durante l anho. 2ª. classeficada ne l çtrito, an corta-mato de moças.
Nunca ye de mais dezir, que nun stamos tan atrasados, cumo muitos que solo fálan por oubir dezir, mos cunsidéran.
La eiquipa mostrando l prémio
An ténis de mesa la nuossa eiquipa de moças fui la melhor ne l çtrito i la segunda na region Norte. Las eiquipas teníen quatro eilementos i mesmo, sendo las alunas de la EAE de l Porto, jogadoras yá federadas, ua de las nuossas alunas quedou an terceiro andebidualmente.
La eiquipa i la aluna cun l prémio
L HOIJE anforma i solo nun sabe quien nun quier, mesmo que nun leia l HOIJE, porque la scuola ten un site i un jornal.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
