Ls bumbeiros de menos de trinta anhos, todos ls anhos fázen un cumbibio çtrital, antes de l período de ls fuogos, para se coincéren melhor i para cumbibir, yá que quaisque todos ls anhos ténen de passar l tiempo de ls fuogos, juntos i an situaçones de muito peligro. Para quien nun se amporta, se nó cun ganhar denheiro ou cun la sue bida, cuida que todo stá parado, todo stá perdido, sei alhá l que dízen.
L jantar
Cumo se puode ber por l retrato son moços i moças, que trabálhan sin sperar medalhas, nin que se diga que son ls melhores de l mundo ou que son amportantes. Nun percísan desso porque se sínten amportantes por aqueilho que fázen. Nun spéran un lugar na politica, para que alguien saba quien son. Eilhes son ls nuossos moços i moças, que ténen todo l balor i de que todos mos ourgulhamos.
Mirai bien para este retrato
Este anho l cumbíbio fui an Sendin, porque neste fin de semana ye la fiesta de San Sebastian, l patrono de ls nuossos bumbeiros. Onte a la nuite houbo un house party i fui ua fiesta mui animada, an que partecipórun muitos moços i moças de ls alredores de Sendin.
L palco i l DJ Neo
Cumo durante l house party era deficil tirar ls retratos, que por cousa de las luzes, nun quedáben bien, tirei-los antes, al sitio onde teníen l bar, para durante l spetáculo se poder matar la sede i al palco.
L sitio de las bebidas
Todo corriu bien i fui mais ua nuite an que ls nuossos moços i moças se debertírun de un modo saludáble.
Para ber ls bidios i ls retratos de l HOUSE PARTY 5 ide a:
http://bhp5.bvsendim.com/
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
