L libro “ Las mies purmeiras palabras an mirandés “ fizo alguas pessonas ler, pensar i poner questiones amportantes.
Porque ten palabras que son defrentes de las que nós usamos i outras que se scríben de modo defrente tamien.
Purmeiro quiero dezir-bos que fui eiditado por l Centro de Studos António Maria Mourinho i que naide de Sendin anterferiu.
L libro tubo la partecipaçon de António Bárbolo Alves de Picuote i de Duarte Manuel Mendes Martins de Malhadas. Ls dous son pessonas que sáben la léngua mirandesa.
Quanto a las defréncias, pus sien las hai, i ne l miu modo de ber, an alguns zeinhos, poderie haber-se puosto ls dous nomes, mas tamien ne l pequeinho bocabolairo - Mirandés/Pertués-, de l Pe. Moisés Pires, hai palabras que nós nun usamos i nun deixa de ser un libro que you uso todos ls dies.
L pequeinho Bocabolairo
L Sendinés, cumo yá bos dixe antes, ye un dialeto próprio i cun la sue própia eidentidade, mas ye parte de la léngua mirandesa. Mas nós, sendineses, nun podemos deixar de l defender.
Tenemos muitas palabras defrentes i frases que parécen mal costruídas i sin lógica, mas nun se trata de erros, mas de ua forma própia de spreçon.
Nun se puode star a ber l sendinés tenendo presentes las gramáticas pertuesa i castelhana.
Mais ua defréncia:
An sendinés, l “ e ” abierto, latino, eiboluiu para “ i ”, anquanto que ne l mirandés eiboluiu para “ ie ”.
Sendinés - -firro -tirra - pidra -fista
Mirandés - -fierro -tierra -piedra -fiesta
Este testo stá screbido cun l- an ampeço de palabra, a la moda de l mirandés de Sendin, cunsante la 1ª. Adenda a la Cumbençon Ourtográfica de la Lhéngua Mirandesa.
