Mal caien uas farrapicas de niebe lougo todo mundo se atrapalha, cumo se fusse la fin de l Mundo. Ye siempre amportante alertar las pessonas para ls peligros de l friu i de l cenceinho, mas nun ye perciso fazer destas cousas ua tempestada, porque hai muitos porblemas para las pessonas resolber i pensar i que son mais amportantes.
Sendin por la manhana
Lougo cedo passei pul Ciclo i cumo an todo l Pertual, talbeç menos porqui, habie niebe que yá cobrie parte de l Ciclo. Para quien yá biu Sendin i las Eiras (onde hoije stá l Ciclo) cun niebe de quaije meio metro, esto nun era nada, mas l tiempo ye outro i pul menos, para ls mais nuobos, siempre fui un die de alegrie.
Na frente de l Ciclo ls moços porparában-se
Mais arriba, uns poucos, bien bestidos i cun las sacas de ls libros a las cuostas, íban saboreando l spetáclo que ye siempre un die de niebe. Mas cumo nun chegou a caer muita niebe i lougo ampeçou a derreter, nin dou para fazer bonecos. Inda ampeçórun, mas fui Sol de pouca dura.
Bien bestidos i cun la saca a las cuostas
Mas nalguns sítios balie la pena ber la niebe
Fui a Fuonte Aldé i puode ber, nas Eiras d’alhá, l guapo spetáclo que ye la albura de la niebe i de las oubeilhas. Tirei mais retratos, mas quédan para outro die. Ten stado friu, mas nada de mais para este tiempo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
