HAI QUE AMBESTIR…
Ser jornalista nun ye fácele i inda mais quando tenemos pessonas respunsábles pur ls meios de anformaçon a amenaçar-los. Fala-se an melhones, an leis, an justícia, an crise i an Stado de dreito, mas cun que moral. Ls probes cada beç mais probes i ls ricos cada beç mais ricos, ls trabalhadores splorados i ls partidos, quier nel goberno, quier nas câmaras i nas juntas, a portegéren ls sous.
L campo de l Sendin
Se dou este eisemplo ye porque ye ua cousa que ten que se usar bários dies pur semana, nun son merendeiros al Sol, que nel Ambierno naide puode outilizar i ne l Berano, solo quando las arboles dáren selombra, se las houbir acerca. Ye ua necidade fazer algo, antes que haba ua zgrácia. Ou se cumpónen las cousas, ou hai que parar.
Ls baneários
L campo inda nun ye l pior, mas ls balneários stan quaije a caer i hai mesmo ua placa que yá stá rachada. Cun estes temporales, l’auga entra por todos ls lados i stragou las máquinas de labar la roupa i cai an drento de ls sítios onde se eiquípan ls jogadores, podendo mesmo haber porblemas cun la eiletrecidade. Naide cumpon, porque quien ten l denheiro nun quier.
Las casas de banho públicas
Nun penseis que ye solo la direçon que ten culpa, porque jógan eiquipas de l Mirandés i de la Câmara, ne l nuosso campo. Quando hai porblemas grabes, las Juntas i las Câmaras dében tratar de ls porblemas. Mas para esso hai que tener senseblidade. Ambestir nestas pequeinhas obras, que al fin i al cabo son publicas, ye un deber, mesmo de l Stado.
Justicia social, leis, melhones!... Para quien?
Apuis queixan-se que hai terroristas…
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
