Die dous de Febreiro quememora-se l die de la apersentaçon de l nino Jasus nel templo, para ser purficado, por esso an muitas tierras se faç la fiesta de Nuossa Senhora de la Purficaçon. Tamien hai quien le chame Nuossa Senhora de las candeias, porque fazien ua percion, cun belas ou candeias, antes de la missa.
Nuossa Senhora de la Purficaçon
An Atanor cháman-le Nuossa Senhora de las Alporcas, l anho passado falei subre esso, eiqui ne l HOIJE, nel die 2 de Febereiro. Para ls que se anteréssan por saber subre las tradiçones podeis cunsultar l HOIJE de ls dies atrasados. Porcurais puls títalos ou puls meses i ancuntrareis muita cousa que bos puode ajudar.
Ne l fin de la percion
La fiesta este anho fui animada pul coro de Sendin, que stubo a cantar na missa. A esta fiesta bénen siempre muitas pessonas de las aldés alredor de Atanor, ou para agradecer las ajudas de Nuossa Senhora, ou para benezir las fitas para traer durante l anho contra la malina de las alporcas.
A la salida de la missa
Ye siempre amportante la cumbibéncia de las pessonas de ls pobos i neste caso, antre Sendin i Atanor. Tamien habie stranjeiros, que tirórun retratos i quejírun saber subre la fiesta i la tradiçon. Quando me pergúntan gusto de ansinar i este anho falei an algo que ls mais nuobos nun sabíen.
…Houbo durante muitos anhos ua antrequidéncia antre Atenor i Trabanca, porque ls de Trabanca dezien que la eimage de Nuossa Senhora era de Trabanca. Quando habie l uso de fazéren perciones até outras tierras, por qualquiera rezon, la eimage que habie benido de Trabanca, antrou na eigreija de Atanor i zde esse die passou a ser dessa eigreija…
…Tamien dezien que la eimage era dua capielha de Trabanca a zlados de Atanor i zbarrolhou-se i ls de Atanor traírun la eimage para la sue eigreija…
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
