Este anho las ciguonhas chegórun mais tarde i ban chegando als poucos, ye ua cousa que you tengo arreparado. Yá uns quinze dies que las bi, mas ne l die dous inda nun habie nanhue an Atanor, l niu staba a la spera cumo podeis ber ne l retrato. I cumo diç la giente:
L die de San Brás (que fui onte)
La ciguonha berás,
Se nun la bires,
L’eimbierno ben atrás.
L niu
I hoije ten sido un die d’eimbierno, cun muita chuba i friu. A la tardechica, nua abierta, fui-me a ber se la ciguonha staba nel niu de la Calçada i alhá staba a porparar-se para se amarrocar. Puls bistos bamos a tener eimbierno até tarde i cun niebe tamien i quando neba an Febreiro, l Berano bai a ser caliente, mas hai un dito que diç: Niebe de Febreiro, sinal de malo celheiro.
L niu de la Calçada
Cumo ls sinales nun son ciertos, porque duas tierras para las outras hai çfréncias, tamien las cousas nun ban a salir eiguales an todas las tierras, por esso nun serán malas las colheitas, para todos. Esto son cousas que l pobo fui daprendendo durante anhos de ousserbaçon. Solo se finta quien quier, mas bamos a tener pouco pan, pouco bino i de pouco grado.
Cumo staba l die, hoije a la tardica
Estes retratos son tamien para ber se bos lembrais de la buossa tierra i para ls que nun son d’acá, conhecéren melhor Sendin.
Gustarie de bos screbir mais i zambuolber ls temas, mas tamien ye buono poner-bos a pensar i até, poner muitos a falar desto i dezir a outros l que sáben, nin que seia solo para dezíren que sáben mais que you.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
