L títalo de la nuoba puode nun parecer mui apropiado, mas ne l Praino cuido que se puode usar cun todo l santido. Ye que hai quatro santos que ténen la sue deboçon bien marcada, nas aldés de la Tierra de Miranda i inda hai mesmo fiestas, an bárias deilhas. Nun ye por acaso que hai l dito: Santo Amaro ye l purmeiro, ye l santo botelheiro . Cumo yá l’outranho screbi subre Santo Amaro (die 15-01-2008), bou a falar de ls outros.
Santo Anton
L die de Santo Anton ye l die 17 de Janeiro, ye l segundo i se Santo Amaro ye "l santo de ls bulhos", Santo Anton ye "l de las chichas". Fui un eirmiton, que dou todo l que tenie als probes i passou a bibir solo, mas l diablo atentou-lo durante muito tiempo, para que pecasse, mas benciu siempre la tentaçon. Daba-se bien cun todos ls animales i por esso ye cunsiderado l portetor deilhes. Rezon porque recorrien a el para ajudar la giente a criar-los.
San Sebastian
L terceiro ye San Sebastian, die 20 de Janeiro i tamien yá screbi subre el i la fiesta que se faç an Sendin. Cumo bedes son santos que ténen a ber cun l tiempo de las matancias i cun toda la tradiçon de las chichas. Santo Anton ye repersentado, tenendo un cochino junto a el. L quarto ye San Brás, que ten la sue fiesta ne l die 3 de Febreiro, que ye hoije.
San Brás
An Sendin habie ua cunfrarie de San Brás. Ne l’eimbierno habie, cumo hoije, las malinas de la gorja (garganta) i se an Atanor, l die dous de Febreiro fázen la fiesta a Nuossa Senhora, para librar de la malina de las alporcas, que tamien ye ua malina que ten a ber cun la gorja (garganta), noutras tierras fázen-la a San Brás para librar de las malinas de l’eimbierno (gripe). Mirai esta ouracion:
Por antercesson de San Brás,
Bispo i Mártere,
Libre-te Dius de l mal de la gorja
I de qualquiera outra malina.
An nome de l Pai, de l Filho i de l Sprito Santo.
Ámen.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
