Muito se fala de las ouriges de las tierras, donde ben l nome, onde tenerie ampeçado l pobo, quien fúrun ls purmeiros a bibir alhá…Todos sabemos que inda hoije ye defícele ancuntrar nuobas del que se passa, para quantas mais del que se passou hai melhares de anhos ou até centenas d’anhos.
La capielha de San Sebastian
La capielha de San Sebastian ( caras a poente)
La curjidade ye ua de las cousas que l home ten de melhor. Ser curjidoso ye meio camino para se porcurar saber. Todos mos perguntamos subre muita cousa de la bida i esso façmos andar. You siempre fui curjidoso por saber i tengo un cierto santido por uosserbar todo l que beio i por onde passo.
Mirai l contraforte de la capielha de San Sebastian
I este ye de la eigreija de Atanor (meio tapado cul acrecento)
Se ponirmos atençon nesto, facelmente bemos que son perecidos, para nun dezir eiguales, porque nun hai nada eigual, mas que fúrun feitos na mesma altura, nun merece dúbedas. I se furmos mesmo al pie deilhes beremos que las piedras son de la mesma altura i la cunstruçon tamien. Mas hai mais eigreijas que fúrun feitas nesse tiempo.
Esta jinela ye de la capielha
Esta ye de la eigreija de Atanor
La purmeira eigreija de Sendin bien poderie tener sido nel sitio de la capielha de San Sebastian. Yá tengo muitos eilementos que lieban a pensar que fui assi, mas hai que studar bien l porblema, mas se hai quien querga fazer uns tudo sério chegará alhá. Alhi ye la ancruzelhada de bários caminos. Na Calçada houbo giente a bibir, zde ls Zoelas até hoije.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
