Quando iba a tirar l retrato a la ciguonha, na Calçada, esta mais ua beç, al ber tirar la máquina, ala a scapar. Quedei cumo quien ceba i nun mata . Mas al mirar para l camino de Ruolos bi la cruç que sta alhi i lembrei-me de bos falar subre l sitio onde you staba i que nun ye mais que la ancruzelhada de bários caminos.
La cruç
Ye alhi que se crúzan cinco caminos, que muito ténen a ber cun la stória de toda la nuossa region. L camino de Ruolos, que iba tamien até Mondin i seguie para l’outro lado del riu. Camino muito outelizado nel tiempo an que ls romanos dominában estas tierras i que fazie ligaçon cun la bia de la prata (ua de las mais amportantes stradas romanas dels purmeiros anhos de la nuossa era) i que zde eiqui ligaba a la strada romana, pul camino que iba a Algoso.
L camino de Ruolos
L camino de Algoso
L camino de Algoso seguie por onde hoije stá la rue que bai a salir a la strada i sigue para la pecina. Para poente salien mais dous caminos, l que iba para Trabanca por la cruç Ferron i l camino caras al Pilo i que iba para Bemposta i Brunhozinho.
L bielho camino caras al Pilo
L camino de Trabanca
Para Norte salie l camino de Miranda que passaba pul pobo i acerca de la Fuonte del Lugar. Todas estas cousas móstran que este sitio serie mui coincido i nada mais fácele que mui acerca houbisse ua stalage para ls caminantes, que darie ourige al pobo ou que houbisse yá un castro, que fui romanizado.
La rue de San Sebastian (camino de Miranda)
Inda hai muito que studar, mas als poucos ban-se ajuntando ls cachicos que farán la nuossa stória. Las purmeiras eigreijas quedában siempre algo zbidas del pobo, ou porque tenerien ourige an eirmitas antigas ou para serbíren melhor bários pobos. La capielha de San Sebastian stá mesmo alhi.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
