Yá habie cumbinado cul, para quando acendisse la forja, que me deziesse para tirar un retrato. Mas l que you nun pensaba era que inda aguçaba sachos. Stou a falar de tiu Manel Margalho del Baiunco. L die chegou i fui alhá.
La forja acesa
A martelar nel fierro caliente
Staba a aguçar un desses artimanhos que dun lado fázen de sacho i de l outro de machada. Son mui outelizados para podar. Fui ua pena esso del arranque de las binhas, mas tenie que ser, yá que muitas stában perdidas i outras, nun tenien cundiçones para se podéren trabalhar.
L artimanho yá bai aguçado
Mas poderien tener feito un trabalho de anformaçon, zde hai muito tiempo, para la melhorie de las binhas i de la culidade del bino, porque sien produçon nun hai riqueza i sien culidade nun hai mais rendimento. Yá se stá a fazer algua cousa, mas ye pouco i sien las ajudas que son percisas. Mas staba a falar de tiu Margalho i podeis acraditar que ye ua liçon.
Ua fechadura a la anti(g)a
Para alhá de inda porparar bários artimanhos, bai fazendo cópias de ls que fazie l pai, hai mais de 50 anhos i que muita giente bai mandando fazer. Mostrou-me la cópia de la chabe de la cidade de Miranda, que guardou para el, quando fizo ua para dar al persidente Ramalho Eanes.
La cópia de la chabe de la cidade de Miranda
La cópia de la chabe de la capielha de Santo Cristo
Estas cópias, yá mais de 25 anhos que las fizo i fui you que las mandei fazer, por esso sabie que las tenie. Inda faç fechaduras para serbíren chabes cumo la de la capielha. La de la cidade nuca mais fizo nanhua i tem aqueilha guardada, para lembrar l feito.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
