Hoije l porgrama de la “Praça da Alegria”, de la RTP, fizo un direto de la praça de Palaçuolo. L HOIJE stubo alhá i ye desso que bos dou la ambora d’hoije. Fui ua manhana animada para la giente de Palaçuolo i un modo de pormober las nuossas tradiçones i la nuossa léngua.
La praça de Palaçuolo hoije
Habie muita giente i l porgrama ampeçou por mostrar ls pouliteiros i las tradiçones. Fui amportante ber la giente que iba falando l mirandés, sien qualquiera miedo de las câmaras, pena que ls mais respunsábles, falássen an pertués i solo uas palabricas an mirandés a modos que a mostrar que sabien la léngua i cumo quien quier mostrar ua cousa rala. L mirandés ye léngua oufecial de Pertual.
Ls pipos
Las facas
Ls pipos i las facas stában persentes, cumo nun podie deixar de acuntecer, yá que son las percipales atibidades de Palaçuolo i que dan trabalho a muita giente. Las facas i ls pipos son sportados para muitas naçones. La fábrica de ls pipos ye ua de las melhores de la Ouropa.
L RTP an direto
L artesanato de madeira ye tamien ua atibidade mui zambuolbida, tenendo artesanos mui conhecidos por todo l paiç i que ténen berdadeiras obras d’arte. Ye mui conhecido l trabalho de Cangueiro, que ten stado persente an muitas feiras de artesanato.
Ls trabalhos de madeira
Para acabar, l porgrama mostrou l que habie para quemer, dze l bulho cun cascas i las tabafeias, até ls doces mirandeses, bolha doce i folar.
Muito se ten falado de las alheiras i de las tabafeias i hai quien pense que son la mesma cousa, que mintira tan grande. Alheiras ténen mais alho i tabafeias mais chicha.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
