Acaba hoije la feira de ls sabores mirandeses, que la câmara ourganizou an Miranda ne l multi-usos de Miranda. Onte fui tamien a la feira i puode ber que habie muita giente, tanto an drento cumo fuora, l que quier dezir que baliu la pena l trabalho.
An drento
A la salida
Cumo todos yá sáben, nestas feiras hai todas las culidades de pordutos regionales, mas l negócio stubo un pouco mais fraco que ne ls outros anhos, porque la crise chegou a todos ls que questúman cumprar. Mas la animaçon stubo melhor que ne ls outros anhos, cun bários grupos de quaije todas las tierras, que mostrórun l folclore mirandés.
Ls chouriços
L fumeiro fui l que tubo mais percura, mas habie tamien artesanato, doces i binos. Sendin stubo alhá cun catorze spositores i de todos ls pordutos. Sendin cuntina a partecipar an todo i stá siempre bien repersentado. Na animaçon stubírun ls nuossos pouliteiros, l grupo de cantares, l rancho anfantil i ls Pica Tumilho.
Maria Fernanda culs sous licores
I cumo nun podie deixar de ser, la Copratiba
La Copratiba este anho tenie un spácio bien cumpleto, onde se mostrában ls binos que la Copratiba ten ne l mercado i fui amportante ber ls diplomas de las medalhas que ten ganhado ultimamente. Las bendas fúrun buonas, solo la marca pouliteiros bendiu mais de 1000 garrafas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
