L antruido an Sendin yá bai sendo coincido por todo lado. Zde que passou a fazer-se l corso, cun la partecipaçon de las rues, passou a ser mais ourganizado i trai mais giente de fuora, mas perdiu la sue oureginalidade. Para muitos yá nun ye l berdadeiro antruido, mas para outros ye mais asseado.
Ls que stában a ber lebában ls garoticos bestidos a la moda de l’antruido
Habie muita giente cun trajes de antruido
La giente era muita
D’atrás l’antruido tenie mais partecipaçon popular porque era ua cousa del pobo, agora las pessonas ténen mais deficuldade porque todo se tornou mais grabe. Quien se lembra inda de tie Manhonha, de tiu Mafra, de tiu Marcelino, de ls Cecílios, ls Patascas, ls menés, tiu Alfredo Júlio, de Jesé Grigório… i de tantos outros, cun las sues atabardas i canti(g)as de antruido.
Até las freiras partecipórun
I la Jinela tamien staba
Mas inda hoije la tradiçon de las familhias se mantén i se nun stában ls que nomeei, stában filhos ou nietos deilhes. Mas mirai para ls retratos que alhá stan todos ls que partecipórun. Eiqui mostro la giente i alguns retratos de mais acerca, para ls que stais loinje poderdes ber ls parientes i ami(g)os.
La giente
D’atrás la giente cumbibie nel Sagrado i íban aparecendo ls que traien las sues cousas para mostrar. Habie algo que nun quedaba mui bien i que fui acabando, que era la farina i ls corchos tisnados para poner a todo mundo cumo un careto. I ls regadores de auga cun que molhában la giente.
Agora ye todo ne l adro de la eigreija
Todo mundo queda a mirar para lhá
A la nuite fui l’anterro, mas quiero lembrar-bos que yá l’outranho fiç la apersentaçon desso i cumo todo fui parecido, ide a ber l HOIJE de l die 6 - Febreiro – 2008. Para ber ls retratos de la giente ye eiqui, ls de l corso de antruido ye ne l sitio de ls retratos. La Jinela, cumo stubo alhá, tamien ten muito retrato para ber.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
