L die anternacional de la léngua materna fui ne l die 21 de Febreiro i cumo era Sábado i a seguir se metíen ls dies de antruido i de cinzas, nun fui possible comemorar esse die ne l die 21 i anton deixou-se la comemoraçon para ls dies 26 i 27. Esto de ls dies nomeados de qualquiera cousa, ye amportante porque siempre hai quien, nien de l die an que naciu se lembre.
L cartaç a anunciar l die
Na biblioteca de l Ciclo
Para alhá de las palhestras subre la léngua i l falar na nuossa léngua i ne ls nuossos melhores scritores, son amportantes atibidades que lémbren l die. L Agrupamiento de Scuolas de Sendin ourganizou muito trabalho para estes dous dies, quier fazendo i comentando testos, nas salas, quier apersentando libros i lendo-los als alunos, na biblioteca.
Un libro de testos de las lénguas eibéricas
L mapa cun la localizaçon de las bárias lénguas
Cada porsor tubo ua hora, an que fui culs alunos a la biblioteca i alhi fazírun l trabalho de la sue sala ou anho. Tamien un grupo de porsores i l repórter de l HOIJE, stubírun nua sesson de leitura de testos de lénguas eibéricas, cumpiladas por un scritor aleman i que traie testos de dous de ls maiores scritores de mirandés. Amadeu Ferreira i Bárbolo Albes.
Manuel Ferreira a ler un de ls testos
L scritor Bárbolo Albes a ler tamien ua parte de un testo del
Fui mui amportante ler esses testos de Amadeu Ferreira i Bárbolo Albes i inda por riba cun la perséncia de un deilhes, que ye porsor ne l Ciclo de Sendin. L repórter de l HOIJE tamien liu i agora speramos que ls comentairos subre ls libros i la léngua, téngan cuntinidade ne l feturo.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
