Oube-se muita beç dezir que nun tenemos turismo, que nun hai nada para mostrar, que esso son pantominas, que nun dá. Tamien you muitas bezes digo l mesmo, mas als que fálan an turismo sien saber l que esso ye i muito menos qual ye la nuossa realidade. I muitas bezes fálan cun tanta cumbicçon nesso del turismo, que mos fázen pensar se nun staremos ciegos ou cun alzaimer.
Esto ye an Sendin
Turismo na nuossa region ten que tener a ber cun la nuossa realidade, la nuossa giente i l nuosso sitio. Nun béngan a querer fazer cousas que naide antende i muito menos, que naide percura. Tamien nun se debe abusar de las nuossas cousas buonas i querer usar-las para nuossa pormoçon personal. Las cousas ténen que ser naturales.
Arribas an flor
Almendreiras an flor
Sendin nun puode bibir cun las cuostas pal riu. Ye caras al riu que tenemos que mirar, ye dalhi que puode benir la maior fuoça turística i eiquenómica. Que me perdónen ls que assi nun pénsan, mas de canti(g)as i pouliteiros, de chicha i tabafeias yá l mundo bai farto i apuis de tantos anhos, stamos eigual.
Sitios destes hai poucos
Nun quiero dezir que todas essas cousas nun son amportantes, mas hai que tener algo mais. Tener l que solo benindo acá se puode sentir. Come-se la puosta i las tabafeias, mesmo an Lisboa. Béien-se las danças i ls pouliteiros, mesmo an Paris. Mas la nuossa paisage, l nuosso aire puro, ls nuossos oulores, la nuossa paç, solo benindo acá ye que se sienten.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
