Falei-bos onte ne l turismo que se puode fazer i que hai que ourganizar an Sendin i que a par de las cousas tradicionales, puode traer giente. Yá bai sendo tiempo de alertar para l que bai sucedendo anho após anho, cun ouportunistas a zbiaren ls sucidios, para ls ami(g)os i para serbíren para ganhar botos i nó para serbir las populaçones i zambuolber l berdadeiro turismo.
La borda de l riu
Esta Junta de Freguesie bai tenendo eideias i bai fazendo cousas que ban de ancontro a ua nuoba forma de ber l feturo de l turismo, mas yá hai ls ouportunistas, que nada fazírun nin fázen a querer tirar galardones i botos de l sou trabalho. Até yá se porpáran para meter la mano ne ls sucidios.
Ua turista junto a ua árbole an flor
Un grupo a quemer la merenda
Apuis de ber l HOIJE de l die 27, la mie mulher quedou antusiasmada i dixo:
- Mas se isso ye assi tan guapo, porque nun bamos a ber las almendreiras an flor?
Cuidais por ende que la mie mulher nun sabe mirandés? Anton naciu i fui criada ne l Baiunco i passaba ls dies cun tie Manhonha i Alda manhonha ye que andaba culha ambrulhada ne l xale pul lhugar, nun habie de saber? I la mai que era de Dues Eigreijas i la lebaba para alhá, i que nun sabie ler, an que léngua l falarie?
You an Forcaleiro
La huorta de miu primo Abílio paxareiro
An beç de ir por ende, por outras tierras, a ber las almendreiras an flor, porque nun ibamos a ber l que ye nuosso? Tenie rezon la mie mulher. Cumbinemos ir i lougo por la manhana, acendiu l forno, fizo trés fogacicas, assou un pernil i ua cebolha, fizo ua bolha doce i ala pal riu.
Cumo gustou de andar pulas arribas
Agora ye un regalo passear por lhi. Ls oulores, l sossego, l cantar dels paixaros ou l arrolhar dels palombos brabos, l’aire de l riu, que bien fazírun a la salude. Quanta giente, mesmo a bibir an Sendin, nunca fui al riu? Antes de querermos que ls outros béngan i gústen de las arribas tenemos que gustar nós.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
