Las arribas son un ancanto i solo puode saber bien l que ye esso, quien las besita an tiempo de Primabera, inda que todo l anho téngan siempre cousas anteressantes i guapas para la giente se ancantar. L HOIJE stá siempre pronto para serbir de guia a quien l piede i muitas son las bezes que acumpanha ls besitantes, amostrando i ansinando l que por alhi se puode ber.
Las arribas neste tiempo
Nua de las ultimas besitas houbo dues cousas que l Hoije puode ber i de que bos bou a dar la ambora, ua ye buona i outra mala. La buona ye que las almendreiras yá ténen almendras bien criadas, cousa que solo ye possible, neste tiempo, nas nuossas arribas.
La almendreira
Mirai cumo yá stá de criada la Almendra
La mala ye la poluiçon que lieba la ribeira de Sendin. La ribeira de Sendin ben zde Pradogaton i bai tenendo bários chamadeiros até chegar al riu. Sendin ye l nome deilha ne ls mapas de l séclo XIX, mas la giente bai-le ponendo l chamadeiro cunsante por onde bai passando, Balcarrasco, Carabilha, Lagas i San Paulo.
La áuga stá negra
Nas Lagas
L poço de l’einfierno
La ribeira ye guapa i ten bários sítios de anteresse, cumo las pequeinhas cachoneiras i ls poços, cumo l poço de l’einfierno. Mas ye nesta ribeira que hai mais molinos, ou melhor restros de molinos i son quaije 20, pul menos yá cuntei 17. Serie amportante poner de ua beç por todas, la ETAR de Sendin a funcionar.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão
