Para muitos leitores de l HOIJE este nome talbeç seia çcoincido, mas trata-se de l nome de un riu que bai a tener al riu Sabor acerca de la puonte de Remondes, antre Mogadouro i Macedo. Yá quantá que fazírun nel, la barraige para regar i abastecer de áuga, l cunceilho de Macedo.
La receçon acerca de l IP4
Muitas bezes las pessonas, por questones partidárias son acontra las cousas i muitas outras bezes, porque son pagas para l séren. Quando fazírun la barraige quaige fazíen ua guerra, mas la barraige stá alhá i fui yá la salbaçon de Macedo i Bergáncia an anhos de seca, quando nun habie auga para la giente buber.
La albufeira
La paisage i l parque anfantil
Outra de las rezones para séren acontra era l mal que iba a fazer al ambiente. Pus hoije ye ua zona portegida i son mundialmente coincidas las ourquidias de l azibo, ua de las froles mais lindas. Ls cogumelos ye ua fuonte de riqueza de toda la region. Las abes selbages son muitas i bariadas i hai mesmo sítios speciales, para las ouserbar.
La praia
Ls turistas de todo mundo ban alhá, podemos dezir que todos ls dies hai alhá rolotes cun giente de todo lado. Hoije stában franceses cun ls sous filhos inda nuobos i fui un regalo ber-los na praia de l riu. Si, porque la albufeira tamien ten mais que ua praia. Para quien nun conhece era buono que l fazísse ua besita.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão
