An Balpaços houbo hoije la Assamblé Giral de la Comisson Bitibinicola de Traslosmontes (CVVTM) para aprobaçon de las cuontas de l anho de 2008. De la Assamblé fázen parte quatro eilementos de Sendin, trés por la Copratiba i un por ls angarrafadores particulares. L persidente de l Cunceilho Fiscal tamien ye de Sendin.
La sede de la CVVTM
La nuossa Copratiba ten benido cada beç mais a tener mais fuorça por toda la region, inda que haba associados que la gustarien de ber cerrar la puorta. Uns porque queríen ser eilhes a fazer l negócio i outros para podéren usar esso para fines políticos. Sendin ten muito einemi(g)o, porque ye grande i ten giente cun balor.
La mesa de la Assamblé Giral
La Comisson tamien ben fazendo un buono trabalho i stá neste momiento a ourganizar tamien la Câmara oufecial de porbadores de bino i aporbeitamos la ambora de HOIJE, para dezir a todos ls moços i moças anteressados, cun coincimentos ou studos na área de ls binos, que poderán fazer un curso de formaçon para podéren fazer parte de la Câmara de porbadores.
Alguns eilementos de la Comisson
Ye la Comisson que certefica todos ls binos VQPRD i DOC de toda la region, que por todos ls cunceilhos de Tráslosmontes ban aparecendo cada beç mais i melhores. Que ls sendineses nun quéden para trás ye l que se spera.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão
