Ne l derradeiro Demingo de Abril faç-se tols anhos la fiesta de la Senhora de la Luç , a la buolta de la eirmida que queda ne l cabeço de la Luç , acerca de Custantin i de la raia. Ye ua de las fiestas mais amportantes de l Praino i ajunta giente de todo l Praino i de las tierras spanholas de Aliste.
L camino até al alto staba cheno de carros
Esta fiesta ye la cuntinaçon de ua tradiçon que ben de antes de l crestianismo i que quando se ampeçou a spalhar pul Praino l culto a Nuossa Senhora, fui aporbeitada para deilha fazer ua fiesta crestiana, an honra de Nuossa Senhora. I an todos ls cabeços que se puoden ber zde alhi i son pul menos siete, faç-se ua fiesta a Nuossa Senhora, que an cada un ten l sou nome.
La eirmida
Ls debotos a rezar
Mas nun ye solo ua fiesta crestiana, ye tamien ua feira popular, d’atrás habie feira de l lado spanhol i de l lado pertués, hoije yá nun hai debisones para l pobo i las outoridades, tamien nun s’ampórtan muito cun la raia, inda que haba inda çfréncias.
La feira
Para muitos ye un die para cumbibir cun ls ami(g)os de ls pobos pertueses i spanholes, para mercar l que muitas bezes nun se pensaba i inda para quemer la puosta. Sei de giente que nun deixa de ir alhá tols anhos. Para ls que nunca fúrun queda l cumbite para ua besita al Praino i a las sues tradiçones.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
