Fizo-se hoije, na Compratiba, ua palhestra subre l bino biológico, ourganizada por la Debison de Biticultura de la Direçon Regional de la Agricultura. Todas estas palhestras son amportantes para que las pessonas stéien anformadas i melhor podéren decedir de la sue bida.
La angenheira respunsáble por la certeficaçon
Quando alguien quier fazer algo nuobo, lougo aparécen ls ouportunistas a queréren ganhar algua cousa. Mas l que amporta para l feturo ye l que se faç i las buonas antençones de quien se apropon a sclarecer las pessonas. Que ls anteressados sában tirar destas palhestras, l que de melhor eilhas mos dán.
Ls agricultores bien atentos
Para nós, fazer bino de ubas biológicas nun ye defícele porque stamos nua region cun todas las cundiçones naturales para esso. Yá quaije se puode dezir que siempre se colhírun ubas biológicas, l que nun habie certeficaçon i nun habie un cuntrolo para eibitar las misturas.
L respunsáble por la Biticultura
La Compratiba colabora siempre cun quien quier melhorar la bida nas nuossas tierras i sendo assi, todos ls que nun podírun star i stan anteressados, púoden ir a la Compratiba onde serán anformados subre todo l que diç respeito a la agricultura.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
