Saliu mais un númaro de l jornal de la scuola de sendin – L POULITEIRO – feito por alunos i porsores, cun la ajuda de la Câmara Munecipal de Miranda. Son muitos ls testos i ls retratos, subre las atibidades de la scuola zde l último jornal.
La capa de l jornal
De las atibidades ye de referir l carnabal, que este anho tubo yá ua reportage ne l HOIJE i que ten ls retratos ne l sitio de las images de l SAL. L çporto fui tamien ua de ls atibidades mais amportantes, yá que la nuossa scuola fui de las melhores an resultados çportibos.
La fuolha de las atibidades
La semana de la ciéncia i la besita de studo a las graburas del Balhe de l Côa fúrun tamien puontos altos de las atibidades de la scuola. La biaige al Balhe de l Côa serbiu tamien para bejitar bários locales de anteresse an Moncorbo i Castielho Melhor.
La bejita de studo
Fazer estes jornales ye amportante para ls alunos se íren treinando para podéren partecipar un die ne l jornal de l Praino, que todo mundo spera que salga debrebe.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
