Hoije fui la fiesta an honra de Santo Eisidro l lhabrador, na Quinta de l Cordeiro, freguesie de Dues Eigreijas, ua de las fiestas tradicionales de l Praino, puode dezir-se que ye la purmeira de un ciclo de fiestas an que la giente lieba ua manta, un chouriço, un carolo de pan i ua pinga i cun la familhia bai a quemer la merenda. Antramoços i bino dán-los alhá de grácia.
Cartaç de la fiesta de Santo Eisidro
Gostarie de haber ido, mas las eileiçones para la Compratiba nun me deixórun tiempo, rezon porque nun tengo retratos de la fiesta, mas dou-bos la ambora para quedardes a saber que hai esta fiesta. I nun bos squeçades que la próssima ye la Trindade – ne l Demingo que ben. Mas tamien de l lado de alhá de l riu hai fiestas eiguales. Manhana ye na eirmida de Santa cruç, an Fermoselle, die 14 an Fariza – la fiesta de ls biriatos.
La eirmita de Santa cruç (Fermoselhe)
Estas fiestas bénen yá de antes de ls romanos que soubírun fazer acordos cun todos ls pobos de la península de modo a tornar-los pobos romanos, lebando-los mesmo a falar la sue léngua. Nun fui cousa de anhos, mas de séclos de aculturaçon. Las fiestas , ls chamadeiros, las tradiçones amóstran bien que fui assi.
L peditório an Palaçuolo
Por la manhana inda fui a la fiesta de Palaçuolo i tirei l retrato al grupo de gueiteiros que fazien l peditório por las rues. Era la fiesta de Nuossa Senhora de l Rosáiro, que ancerraba l més de Maria, esta ye moderna, mas nun tenerá ourige noutra mais anti(g)a?
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
