A LA CUMBERSA CUN …(cont.)
Cuntinando la cumbersa cun António Bárbolo Alves:
Requalificaçon de la aldé de Picuote, porjeto de la FRAUGA , de que António Bárbolo Alves, ye diretor
H – Sabemos que fizo parte de l grupo que aprobou la Cumbençon de la Lhéngua mirandesa, fui defícele l trabalho?
ABA – Todo ten la sue deficuldade, mas quando hai un grupo de pessonas anteressadas, todo se torna fácele i todos dórun l sou cuntributo, cada un a la sue maneira, mas l trabalho de todos fui amportante.
H – L grupo que fizo la cumbençon, cumo fui scolhido?
ABA – Nun sei nin penso que isso seia l mais amportante neste momemto. Fui l grupo possible i tenie giente muito cumpetente, zde l Pe. Mourinho i l Pe. Moisés a la doutora Manuela Barros Ferreira i a la drª. Cristina Martins, que staba a fazer l mestrado an “Língua Mirandesa”.
António Bárbolo Alves scribe l sou nome nun eijemplar de l sou lhibro “cuontas de la tierra de las faias”
H – Tamien stabades a fazer l mestrado ou yá habiedes feito l doutoramiento?
ABA – Staba a fazer l mestrado na Ounibersidade de l Minho, mestrado que ampecei por anfluéncia de l porsor Telmo Verdelho, de la Ounibersidade de Abeiro, a quien oubi fazer ua quemunicaçon subre l mirandés, i que acabarie por fazer parte de l júri de aperciaçon de la mie dissertaçon de mestrado.
H – De que trataba la buossa dissertaçon?
ABA – “A Língua mirandesa: contributo para o estudo da sua história e do seu léxico”, defendi-la an 1997, la cumbençon fui aporbada an 1995. Lhougo ampecei a trabalhar ne l doutoramiento, tamien subre l mirandés. Ye l purmeiro doutoramiento subre la nuossa lhéngua.
La FRAUGA (sede de la Associaçon de Picuote)
H – An cuncreto l buosso doutoramiento subre que fui?
ABA – L doutoramiento fui subre “palavras de identidade da Terra de Miranda”. Defendi-lo an 2002 na Ounibersidade de Toulouse II, an Francia.
(contina)
