Hoije querie dar-bos trés nuobas que débeis tener an cunsideraçon porque son amportantes i porque dében partecipar neilhas todos ls que podíren i stubíren anteressados, culs que nun s’ampórtan nun hai que cuntar, mas pul menos quédan a saber l que se faç i yá nun percísan de perguntar l que se stará a passar nesses dies.
L cartaç de la Trindade
Manhana ye la Trindade i ala a ir a fazer munton na ronda a la buolta de la capielha, esto nun ye solo pals sendineses, mas para todas las aldés alredor de sendin. Ye ua de las melhores tradiçones de partecipaçon popular i nun la debemos deixar acabar. Para ls que nun gústan de tradiçones, hai la fiesta de la Santíssima Trindade , cun missa i ua guapa precisson, rezon para ir tamien.
L cartaç de l cuncurso de binos
Ne l die 13 de Junio hai un cuncurso i proba de binos na Associaçon de Fuonte Aldé an que puoden partecipar todos ls que fázen bino, para dáren a porbar l sou bino i para podéren amostrar la sue catagorie, nun bonda agabar-lo, hai que probar que ye buono. Ne l fin, hai comer i bober para todos ls partecipantes.
L’ancontro de bloguers
Ne l die 22 de Agosto, na Trindade, hai un ancontro de bloguers de todos ls que l gusta andar por la anternete i fázen, partecípan ou léien ls blogues de l Praino. Este ye l segundo ancontro, l purmeiro fui ne l Naso i fui anteressante, que neste partecipeis todos, para mos conhecermos melhor i cumbibir.
http://bloguersnopraino.blogspot.com/2009/03/foro.html
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
