La fiesta de la Trindade ten tamien un ancanto special, porque ye ne l fin de la precisson que ten lugar l que de mais tradecional ten la fiesta - las rondas a la buolta de la capielha - i cuidamos mesmo que serie este uso de se ancuntráren ls pobos de alredor de l cabeço, que dou ourige a la fiesta.
La ronda de Fuonte Aldé
L ancontro, neste sitio, de ls pobos (que ne ls tiempos mais anti(g)os serien las bárias tribos de un pobo quemum – l Zoela), serbie para porparar l einicio de las colheitas i agradecer als diuses. Ne l local hai bestigios de l sitio adonde éran feitas las oufiertas i las fogueiras de ls sacraficios.
La ronda de Sendin
Cun la romanizaçon desses pobos i a seguir, cun la crestianizaçon de l ampério romano, todos esses usos i questumes fúrun aporbeitados, purmeiro puls romanos para melhor ls romanizar i apuis pul crestianismo, para ls lebar a seguir la relegion crestiana. Todas essas fiesta passórun a ser an honra de santos ou debindades crestianas.
La ronda de Pradogaton
La tradiçon de las rondas ye hoije l ancontro de las mocidades de ls bários pobos alredor de l cabeço de la Trindade , para cumbibíren, coméren la merenda i dar la buolta a la capielha, cun ls sous standartes i galhos de carbalheiras nas manos. La banda bai a buscá-los, cada malta de sue beç.
La banda de Miranda, culs mardomos delantre
Las rondas son debidamente ourganizadas por las mocidades i todos líeban ls sous tocadores i ls xefes de la mocidade delantre. Bielhos i nuobos, todos quíeren partecipar i nó ralamente, hai giente que ben d’aperpósito para partecipáren i amostrar als filhos, para que la tradiçon nun se acabe.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
