L Agrupamiento de Scuolas de Sendin fizo hoije la fiesta de fin d’anho i cumo ben sendo uso houbo muitas atibidades, lougo por la manhana l triato mirandés tenie que star pessente, yá que an Sendin i alredores, l mirandés ye ua léngua cun território, ye falada i ansinada als mais nuobos.
L triato mirandés
Ua léngua sien território nun ten feturo, se queremos que la léngua cuntine. Ye nesso que trabalhamos, que la léngua tenga feturo, amostrando ls trabalhos de quien faç por l’ansinar, nó a un ou dous para ls jornales dáren las nuobas ou las telebisones l’amostráren, mas als ninos que son l feturo de l’ansino i de la léngua.
Dous momentos de l triato
L porsor Eimilio ten dinamizado de tal modo la léngua que ye querida i acarinada por ls alunos. Cul sou jeito para l triato de que ye l percipal dinamizador, inda que las telebisones i ls jornales nun fágan desso nuoba porque nun ten padrinos alhá, bai cunseguindo que la scuola seia un sitio alegre. Quando hai triato ou teleguincha, ye die de fiesta.
Ls atores
L triato d’hoije fui ua quemédia en que dues ties de la cidade, éran puostas delantre de ua realidade, que ye l mirandés nua pizzarie an Pradogaton. L triato quijo tamien amostrar que yá nun hai cumplexos de falar mirandés i que até sierbe para poner a ridículo ls questumes citadinos.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
