Na EBI de Sendin fui feito un bidio an mirandés subre la bida de la scuola al longo de l anho cun argumento de l porsor Eimilio Martins, eimages de l ampregado Fernando Rodrigues i colaboraçon de ls ampregados Fernando Pires i Fitas i de l porsor Carlos.
An direto de Bamba
Ne l bidio partecipórun muitos alunos de la scuola, mas an special ls alunos de mirandés que mais ua beç amostrórun l sou amor por la lhéngua, porque l mirandés ye ua aula a mais a que ténen que assistir para alhá de las outras i se hoije yá ye defícel fazer ls alunos ir a las aulas normales, mirai se nun son eirredutibles mirandeses estes garotos i porsores.
La apersentaçon de l bidio na scuola
Para alhá de las bárias trabessuras de la scuola, tamien la bida de l die a die na quemunidade nun fui squecida i báriadas cenas fúrun representadas cuma la nuoba tequenologie al serbicio de la anxertie de la binha, cun l podador assistido por ua plêiade de ajudantes, que l serbíen las puas nua bandeija, cun lubas albas de niebe i l cobríen cun un guarda-chuba para nun apanhar sol.
L sorteio
La tarde acabou cun un sorteio que ls finalistas fazírun para ajuntar para la nuite de l baile i para la scurçon de fin d’anho.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
