La Frauga
Un sitio que me lembra ls mius tiempos de garoto. Acordaba pula manhana i ya s’oubie l sonido de l picar de l martielho de tiu Marchacan. Lembra-me muita beç. Ibamos para alha a ber ls homes a bater ne l fierro caliente i burmeilho an brasa acabado de salir de l lume.
Muitas stórias se puodin cuntar i áspero que mais giente las ache i ajunte a este tema, mas la que querie cuntar agora ye especial i passou-se este anho de 2007 ne l die de Nosso Senhor.
Iba para casa apuis de la persion i passei an pie de la puorta de la Frauga i cumo tenie la maquina na mano, resulbi tirar un retrato por la frincha de la puorta, solo para ber cumo staba aqueilho an drentro.
L mil spanto fui a dobrar. Purmeiro nun cuntaba antrar, apuis aqueilho staba eigual, eigualico cumo se stubissen a trabalhar alha l die atrás.
Fui ua sensaçon ancrible. Nun pudeis manginar. Quando tubirdes un ratico ide alha a ber. Staba todo eigual que até me dou ua calantriç na spina.
Habie aranheiras por todas partes, mas la bigorna inda staba alha ampunente al meio, la maquina de suldar peç que tenie sido deixada alhie a la spera que l donho benisse outra beç i la mesa de trabalho eigual.
Deixo-bos ls retratos que tirei i un que achei mais antigo onde se bei tiu Marchacan i outros ajudantes a trabalhar l fierro.
